Нас не любяць, нас баяцца
Поп кудлаты і кулак,
Бо рашыў за працу ўзяцца
Камсамольскі маладняк.

Сцёпка некалі на пана
Працаваў, як чорны вол,
А сягоння сын Сцяпана
Запісаўся ў камсамол.

Ох вы, хлопцы-камсамольцы,
З камсамольскага сяла,
Я, вясковая дзяўчына,
Павучыцца к вам прыйшла.

Калі ласка! Калі ласка!
Тут заўсёды месца ёсць,—
Не саромейся ж, Параска,
Ты для нас — жаданы госць.

Ох, я богу не малюся,
Не малюся і Хрысту,
Я нікога не баюся —
Камсамолкаю расту.

Камсамолачка Дарота!
Пойдзем разам ваяваць,—
Буду біць я з кулямёта,
Ты — патроны падаваць.

Хто супроць нас? Прэч з дарогі!
Бачыш нашу грамаду?
Мы саб'ём і чорту рогі,
Богу вырвем бараду.

Па планеце пройдзем бурай,
Марксаў помнячы завет,—
Свет стары ушчэнт разбурым
I збудуем новы свет.

1923